കൊച്ചി: വി.ഡി.സതീശനെ മുഖ്യമന്ത്രിയാക്കണമെന്ന ആവശ്യം ഉയർത്തി തൃശൂർ, കണ്ണൂർ, എറണാകുളം ജില്ലകളിലെ വിവിധ ഭാഗങ്ങളിൽ പ്രകടനങ്ങൾ നടന്നു. അദ്ദേഹത്തിന്റെ ജന്മനാടായ നെട്ടൂരിൽ വൈകിട്ട് അഞ്ചുമണിയോടെ ഐഎൻടിയുസി ജംഗ്ഷനിൽ നിന്ന് ആരംഭിച്ച പ്രകടനം എസ്.എൻ ജംഗ്ഷനിൽ സമാപിച്ചു. ‘പട നയിച്ചവൻ നാട് നയിക്കട്ടെ’ എന്ന ഫ്ലക്സ് ഉയർത്തിയായിരുന്നു പ്രവർത്തകരുടെ പ്രകടനം.
മരട് നഗരസഭ മുൻ സ്ഥിരംസമിതി അധ്യക്ഷനും കെപിസിസി നിർവാഹക സമിതി അംഗവുമായ കെ.ബി. മുഹമ്മദ് കുട്ടിയുടെ മകൻ റിയാസ് കെ. മുഹമ്മദിന്റെ നേതൃത്വത്തിൽ ഐഎൻടിയുസിയും കോൺഗ്രസ് പ്രവർത്തകരും ചേർന്നാണ് പ്രകടനം സംഘടിപ്പിച്ചത്. നെട്ടൂർ ഐഎൻടിയുസി പ്രസിഡന്റ് കെ.എസ്. ഉബൈദ്, സെക്രട്ടറി പി.എ. നിസാർ, കോൺഗ്രസ് മരട് വെസ്റ്റ് മണ്ഡലം വൈസ് പ്രസിഡന്റ് കെ.എം. സിദ്ദിഖ്, സെക്രട്ടറി സുനീർ പുറക്കേലി, സലാം പുറക്കേലി എന്നിവർ പ്രസംഗിച്ചു.
കുന്നംകുളം നിയോജക മണ്ഡലത്തിലെ കടവല്ലൂർ മണ്ഡലം യൂത്ത് കോൺഗ്രസിന്റെ നേതൃത്വത്തിലും വി.ഡി.സതീശനെ മുഖ്യമന്ത്രിയാക്കണമെന്ന ആവശ്യവുമായി പ്രകടനം നടന്നു. യൂത്ത് കോൺഗ്രസ് മണ്ഡലം പ്രസിഡന്റ് എം.എച്ച്. ഹക്കീം, ബ്ലോക്ക് സെക്രട്ടറി ജമാൽ കോട്ടോൽ, യൂത്ത് കോൺഗ്രസ് ബ്ലോക്ക് സെക്രട്ടറി സിറാജ് കടവല്ലൂർ, കെ.എസ്.യു മണ്ഡലം പ്രസിഡന്റ് ഷാദുലി ആൽത്തറ, മണ്ഡലം സെക്രട്ടറി സഹദ് കല്ലുമ്പുറം, കോൺഗ്രസ് ബ്ലോക്ക് സെക്രട്ടറിമാരായ ഉണ്ണിക്കുട്ടൻ, സുബ്രമണിയൻ, മണ്ഡലം വൈസ് പ്രസിഡന്റ് റസാഖ് കരിക്കാട്, ഐഎൻടിയുസി ദേശീയ നിർവാഹക സമിതി അംഗം മസ്താൻ കോട്ടോൽ എന്നിവർ നേതൃത്വം നൽകി.
കുറ്റ്യാടി ടൗണിൽ നൂറോളം പേർ പങ്കെടുത്ത പ്രകടനവും നടന്നു. വി.ഡി.സതീശനെ അനുകൂലിച്ച് കണ്ണൂർ ജില്ലയിലെ ഇരിട്ടി, പേരാവൂർ, പഴയങ്ങാടി എന്നിവിടങ്ങളിലും പ്രകടനങ്ങൾ സംഘടിപ്പിച്ചു. ഇരിക്കൂരിൽ യൂത്ത് ലീഗ് സതീശന് പിന്തുണ പ്രഖ്യാപിച്ച് ഫ്ലക്സ് ബോർഡും സ്ഥാപിച്ചു. കോൺഗ്രസിൽ നിന്ന് പുറത്താക്കിയ തോമസ് വർഗീസ് ഇരിട്ടിയിലെ പ്രകടനത്തിൽ എത്തിയതിനെ തുടർന്ന് സംഘർഷാവസ്ഥ ഉണ്ടായി. തുടർന്ന് ഇദ്ദേഹത്തെ പ്രകടനത്തിൽ നിന്ന് പുറത്താക്കി.
