കൊച്ചി: പുതിയ യുഡിഎഫ് മന്ത്രിസഭയിൽ മുഖ്യമന്ത്രിയുൾപ്പെടെ നാല് മന്ത്രിസ്ഥാനങ്ങൾ ലഭിച്ചതോടെ എറണാകുളം ജില്ല ശ്രദ്ധേയ നേട്ടം സ്വന്തമാക്കി. പറവൂരിൽ നിന്നുള്ള വി.ഡി. സതീശൻ മുഖ്യമന്ത്രിയായപ്പോൾ, അങ്കമാലി എംഎൽഎ റോജി എം. ജോൺ, പിറവം എംഎൽഎ അനൂപ് ജേക്കബ്, കളമശേരി എംഎൽഎയും മുസ്ലിം ലീഗ് നേതാവുമായ വി.ഇ. അബ്ദുൾ ഗഫൂർ എന്നിവരാണ് ജില്ലയിൽ നിന്നുള്ള മറ്റ് മന്ത്രിമാർ. കഴിഞ്ഞ എൽഡിഎഫ് മന്ത്രിസഭയിൽ കളമശേരി എംഎൽഎ പി. രാജീവ് മാത്രമായിരുന്നു ജില്ലയിൽ നിന്നുള്ള മന്ത്രി.
പറവൂരിൽ നിന്നുള്ള വി.ഡി. സതീശൻ കേരളത്തിന്റെ മുഖ്യമന്ത്രിയായി ചുമതലയേൽക്കും. ദീർഘകാല പാർലമെന്ററി പരിചയവും പ്രതിപക്ഷ നേതാവെന്ന നിലയിലുള്ള പ്രവർത്തനവുമാണ് അദ്ദേഹത്തെ ഈ സ്ഥാനത്തേക്ക് നയിച്ചത്. ധനം, തുറമുഖം, നിയമം തുടങ്ങിയ പ്രധാന വകുപ്പുകൾ മുഖ്യമന്ത്രിയുടെ നിയന്ത്രണത്തിലായിരിക്കും. 2001ൽ ആദ്യമായി പറവൂരിൽ നിന്ന് നിയമസഭയിലെത്തിയ സതീശൻ തുടർന്ന് നടന്ന എല്ലാ തിരഞ്ഞെടുപ്പുകളിലും മണ്ഡലത്തിൽ നിന്ന് വിജയിച്ചു. കെ.എസ്.യുവിലൂടെയും യൂത്ത് കോൺഗ്രസിലൂടെയും രാഷ്ട്രീയത്തിൽ സജീവമായ അദ്ദേഹം നിയമ ബിരുദധാരിയുമാണ്. ഭാര്യ ലക്ഷ്മിപ്രിയ.
2016 മുതൽ അങ്കമാലി എംഎൽഎയായ റോജി എം. ജോൺ ഇത്തവണയും മന്ത്രിസഭയിലെത്തി. വിദ്യാർഥി രാഷ്ട്രീയത്തിലൂടെയാണ് പൊതുരംഗത്തെത്തിയ റോജി, ഡൽഹി ജവഹർലാൽ നെഹ്റു സർവകലാശാലയിൽ നിന്ന് ഉന്നതവിദ്യാഭ്യാസം നേടിയിട്ടുണ്ട്. എൻ.എസ്.യു.ഐ ദേശീയ പ്രസിഡന്റായും പ്രവർത്തിച്ചിരുന്നു. ഭാര്യ ലിപ്സി.
കേരള കോൺഗ്രസ് (ജേക്കബ്) വിഭാഗത്തിന്റെ നേതാവായ അനൂപ് ജേക്കബ് പിറവം മണ്ഡലത്തിന്റെ പ്രതിനിധിയായാണ് മന്ത്രിസഭയിലെത്തുന്നത്. മുൻ മന്ത്രി ടി.എം. ജേക്കബിന്റെ നിര്യാണത്തെ തുടർന്നുള്ള ഉപതിരഞ്ഞെടുപ്പിലൂടെയാണ് അനൂപ് ആദ്യമായി നിയമസഭയിലെത്തിയത്. പിന്നീട് നടന്ന തിരഞ്ഞെടുപ്പുകളിലും തുടർച്ചയായി വിജയം നേടി. നിയമ ബിരുദധാരിയായ അനൂപ് കെ.എസ്.സി (ജേക്കബ്) വിദ്യാർഥി സംഘടനയിലൂടെയാണ് പൊതുരംഗത്ത് സജീവമായത്. ഭാര്യ അനില മേരി ഗീവർഗീസ്.
മുസ്ലിം ലീഗ് പ്രതിനിധിയായി കളമശേരിയിൽ നിന്ന് വിജയിച്ച വി.ഇ. അബ്ദുൾ ഗഫൂറും മന്ത്രിസഭയിൽ ഇടം നേടി. മുസ്ലിം ലീഗ് നേതാവ് വി.കെ. ഇബ്രാഹിംകുഞ്ഞിന്റെ മകനായ അബ്ദുൾ ഗഫൂർ, സിപിഎം നേതാവ് പി. രാജീവിനെ പരാജയപ്പെടുത്തിയാണ് ആദ്യമായി നിയമസഭയിലെത്തിയത്. 2021ലെ തിരഞ്ഞെടുപ്പിൽ പരാജയപ്പെട്ടിരുന്ന അദ്ദേഹം ഇത്തവണ വിജയത്തോടെ മന്ത്രിസഭയിലേക്കെത്തി. നിയമ ബിരുദധാരിയായ അബ്ദുൾ ഗഫൂർ അഭിഭാഷകനായും പ്രവർത്തിച്ചിട്ടുണ്ട്. ഭാര്യ ദിലാറ.
